Hilat estatau

Es agéncies anticorrupcion existentes en Estat espanhòu acordèren, en ua amassada celebrada ena sedença deth Burèu Antifrauda de Catalonha eth 29 de junh de 2018, crear un hilat estable e damb amassades periodiques entà partatjar estratègies comunes entà lutar contra aguest fenomèn. En mots deth director d’Antifrauda de Catalonha, Miguel Ángel Gimeno, “eth nòste objectiu ei de partatjar es estratègies de luta contra era corrupcion mentre eth govèrn non se decidisque a crear un Plan Nacionau contra era corrupcion”.

Era prumèra amassada d’agéncies anticorrupcion existenta en Estat espanhòu amassèc eth maxim responsable deth Burèu Antifrauda de Catalonha, Miguel Ángel Gimeno; eth director dera Agéncia de Prevencion e Luta contra era Fraudaria e era Corrupcion dera Comunitat Valenciana, Joan Llinares; eth director deth Burèu de Prevencion e Luta Contra era Corrupcion enes Ièrles Baleares, Jaime Far; eth conselleiro do Consello de Contas de Galícia, Constantino Carreiras; eth director deth Burèu Municipau contra era Fraudaria e era Corrupcion der Ajuntament de Madrid, Carlos Granados; e es responsables deth Burèu entara Transparéncia e es Bones Practiques der Ajuntament de Barcelona: era directora de servicis de Contraròtle de Gestion, Maria del Mar Giménez-Salinas, e era directora de servicis d’Analisi dera madeisha institucion, Rosa Maria Sánchez.

Eth hilat d'agéncies anticorrupcion ei un espaci d'unificacion de critèris d'accion sense desbrembar era independéncia de cada institucion. D'aguesta manèra se profiten es metodologies de formacion e prevencion, e es experiéncies concretes de cada agéncia, damb era tòca de renfortir era eficacitat ena accion d'aguesti organismes.