Eth baromètre 2014 a estat presentat aguest maitin peth director deth Burèu Antifrauda. Aguesta enquèsta arrecuelh es percepcions e actituds dera ciutadania ath torn deth fenomèn dera corrupcion en Catalonha. Er estudi, a estat elaborat peth Burèu Antifrauda de Catalonha en collaboracion damb eth Centre d'Estudis d'Opinion (CEO) dera Generalitat. Se realizèc deth 10 ath 18 de noveme de 2014 mejançant 800 enquèstes telefoniques arreu deth territòri.
Es resultats dera mòstra s'an presentat eth 9 de deseme de 2014, en tot coïncidir damb es actes de commemoracion deth Dia Internacionau Contra era Corrupcion.
Era presentacion a estat a cargue deth director deth Burèu Antifrauda, Daniel d'Alfonso, que entre de aute consideracions a destacat que "era ciutadania demane ua urgenta e substanciau reforma des partits politics entà per'mor de tornar a confiar en eri" e a hèt ua crida a "era professionalització deth sector public".
Tanben a dit que "es nivèus de tolerància deth ciutadan damb era corrupcion son de mès en mès baishi", per aguest motiu "era ciutadania demane mès contundéncia deuant es indicis de corrupcion enes cargues publics".
Fin finau a demanat ara ciutadania que denóncie es casi de corrupcion e, ath madeish temps, a demanat ath legislador que hèsque eth de besonh pr'amor que denonciar sigue facil e segur.
